خلاصة سنة الامتياز - علم نفس اكلينكي : جامعة الأميرة نورة بنت عبد الرحمن 3> ..

Photo by Tirachard on Freepik

فترة التدريب وما أدراك ما فترة التدريب !

شعورالحماس الممزوج بالتوتر .. الهلع يمكن ، فكرة إني ما درست كفاية ، أو كيف بأسوي الشي الفلاني ، أو أنا ما أعرف شي ، أو كيف بأتذكر كل اللي درسته ، وكيف بأتعامل مع الحالات و.... إلخ

كل اللي ذُكر فوق هو أمر طبيعي جدًا ، وعاشه ناس كثير مرّوا بهالتجربة باعتبارها تجربة جديدة بالنسبة لهم وبيخوضونها للمرة الأولى !

لذلك اطمئنوا وارتاحوا ، أولًا : لأنها مشاعر طبيعية ، ثانيًا : وهو الأهم إنكم ما وصلتوا هالمرحلة في الأغلب إلا وأنتم قدها، وإن غلطتوا فلا بأس لأنكم في مرحلة تعليم مو احتراف ..

وبما إني مريت بتجربة الامتياز، فيسعدني جدًا مشاركة أبرز الملاحظات اللي ممكن بطريقة ما تفيد البعض منكم – وهذا ما أتمناه - ، رغم إن بعضها وللأسف ما استوعبتها إلا يمكن بعد الامتياز !

تذكروا شي مهم : إن المكتوب عبارة عن خلاصة تجربة شخصية ؛ خذوا منها اللي يناسبكم واتركوا اللي ما يناسبكم ..

في سنة 2018 ، وتحديداً في شهر اغسطس انتهيت بفضل ربي من سنة الامتياز اللي كانت تجربة من أثرى التجارب اللي عشتها بحياتي .. واللي مهما تكلمت عنها ما انتهي ! ..

أتذكر يومها الأول والأخير ، كلها كانت مليانة مشاعر وأفكار كثيرة ، ولا أنسى أبدا الأيام اللي بينهم ! ، لكن اللي أتذكره قبل هذه التجربة هو الأيام والأسابيع اللي سبقت يومي الأول .. توجيهات وإرشادات كليتنا بخصوص هالسنة – اللي بدت من السنة الدراسية الأخيرة حتى آخر الامتياز – فلا شكر يكفي لجهد وعطاء جامعتنا المميزة وكليتنا الرائعة .. وأتذكر أيضا إني كنت أشعر بحاجتي لتوجيه خاص بتخصص علم النفس العيادي ، ويطمني أكثر بخصوص هالرحلة أكثر ؛ لأني كنت شايلة هم مثلكم =)..

ولكنها الحمدلله مرّت بأفضل مرور بتوفيق ربي ثم دعم الأهل والجامعة والصديقات ، وحب التخصص .. وأتمنى إنها تكون كذلك لكم كلكم بأفضل وأحسن الأحوال ..

أبدأ بسم الله :

- في البداية ، اعرفي إنه بيجيك ذاك الشعور اللي أنا ما درست ولا أعرف شي ، وهذا شعور طبيعي لأنها مرحلة انتقالية وتجربة جديدة عليك .. واعرفي من اللحين إنك بتجيبين العيد ، وعااااادي جدا لأنك في مرحلة تعلم .. مرحلة ايش ؟!! .. مرحلة تغلطين وتتعلمين ، محد بيتوقع إنك أخصائية بدرجة دكتوارة ولا حتى بتمسكين حالات حرجة في البداية ، فلا تخافين .. قريت تغريدة تقول : " سمعت دكتور يقول أن هذا مره طبيعي لأنك بعد ما تتخرجين تصير معلوماتك كأنها كرة صوف ما تعرفين وشلون تستفيدين منها، لكن مع الممارسة والتجربة والخبرة تبدأ تتفكك الكرة وتوضح وتبان  فعادي تحسين أنك ما تعرفين تسوين شي لأنك ما "سويتي" للحين "

تقبلي أخطائك وافهميها واستمتعي قد ما تقدرين ..

- لكل مكان فيه التوجيهات الخاصة فيه يوضّح فيه اللي لك واللي عليك )  Orientation ( ، و تختلف فترتها وطولها من مكان لآخر، اسألي واستفسري من المشرفـ/ـة  في المكان اللي تتدربين فيه أو مسؤولة التدريب في الجامعة إذا ما فهمتِ شي أو أشكل عليك أمر بعدين  ..

خلي مصدرك موثوق وارجعي للأساس، ولا تخلينه فلانة وعلانة ولاّ سمعت ..

- اعرفي إن هالسنة من أحلى سنوات عمرك ، بتمرين بمشاعر حلوة جدًا ونقيضها تمامًا ،  وتعيشين لحظات بغض النظر عن طبيعتها بتبقى ذكرى ببالك .. بتعرفين نفسك وتكتشفين جوانب جديدة ، حدود وزوايا كانت غير مرئية بالنسبة لك .. وأنا أؤكد لك إن الشخص اللي أنتِ عليه الآن ، بيكون مختلف تمامًا بعد سنة ..

مهما اكتشفتي ومهما صار خليك لطيفة مع نفسك ..

- أسألي واستفسري وابحثي وكوني مبادرة ، لا تسكتين أو تستحين .. ما أزيد ضغط عليك بس لا تنتظرين الشي يجيك أبدًا .. أغلب الأمور إذا مو كلها ، أنتِ لازم تبادري فيها ..

استغلي الفرص اللي تجيك لأن بعضها ما يتكرر ..

- تعلمي تشرحين بالعربي وكيف توصلين كلامك للمرضى أو المراجعين بشكل بسيط وبدون مصطلحات طبية بحتة إلا إذا بيكون لها شرح واضح .. مهم جدا التثقيف النفسي راقبي اللي تروحين معه وتعلمي منه ..

افهمي الأساسيات صح، وطبقيها بأسلوبك ..

- خلي معك نوت وقلم دايم واكتبي أي معلومة ، في البداية يمكن تكتبين حتى سواليفك مع المشرفة ، بس بعدين بتبدين تفهمين وشو اللازم وشو اللي مو لازم  ..وركزي على طريقة المقابلة الأولية وأخذ التاريخ المرضي ..

حطي لك رموز معينة واضحة كاختصار – إن قدرتِ – أو قسمي النوت لأقسام تناسب المعلومات المهمة، ولا تنسين الكلمات المساعدة ..

- استفيدي من الملاحظات والـ Feedback  اللي تجيك من المشرفين أو زميلاتك ، واستفيدي من الخبرات اللي عندهم مهما كانت ، تناقشوا في بينكم في بعض الحالات مع احترام مبدأ خصوصية المعلومات ..

لا تترددين في طرح أي سؤال أو طلب أي ملاحظة ..

- افصلي من البداية ما بين البيت والعمل ، وخلي لكل واحد مساحته اللي ما تتعدا على الآخر .. يمكن يكون صعب عليك في البداية بس تعلمي تخلين شخصك عند مدخل المكان اللي تتدربين فيه ، وإذا رحتي للبيت خذيه معك واتركي شخصيتك المهنية برا البيت ..

احترمي وقت البريك زي ما تحترمين وقت الشغل، وخليه بريك لأنه بكل بساطة بريك !

- اعطي لنفسك مساحة واسعة إنها تتعلم ، مو بس في التخصص اللي أنتِ فيه .. اقرأي وراقبي التعاملات الشخصية ، والمهنية مع الناس اللي حولك وتعلمي من أخطائهم وتجاربهم ..

تعلمي من كل شي تطيح عينك عليه ..

- المقاييس والاختبارات النفسية ، شوفي طريقة المشرفـ/ـة في تطبيقها  ، وتدربي عليهم بالعربي ( إذا ما قد مروا عليك ) ، واعرفي كيف تشرحينها للمريض بطريقة سهلة وصحيحة ، وحطي ببالك إنه ممكن يقولك ما فهمت اشرحيها لي ! ، لذلك تأكدي من فهمك لها ..  سوي role play مع وحدة من البنات أو أحد من أهلك أو حتى مع نفسك وخذي Feedback  منهم ..

أسألي المشرفـ/ـة اللي أنت معه عن المقاييس اللي يستخدمها أو المستخدمة وتدربي عليها في أوقات الفراغ ..

- هذي بعض الكتب اللي عرفتها – وإن ما قرأتها كاملة ولكني اطّلعت عليها - وممكن تساعدك في هالرحلة – وللأسف عرفت بعضها متأخر - :

 *الطب النفسي المعاصر لد. أحمد عكاشة

* الأفكار والمشاعر : السيطرة على حالاتك المزاجية وعلى حياتك - مترجم

* العقل فوق العاطفة - مترجم وموجود  pdf

* العلاج المعرفي ، الأسس والأبعاد مترجم وموجود  pdf

* Diagnostic and Statistical Manual of Mental Disorders (DSM) 5

* Psych Notes Clinical Pocket Guide / 5th Edition

* Interview guide for evaluating Dsm-5 psychiatric disorders and mental status examination

آخر 2 : كنت أتمنى لو اقتنيتها فترة امتيازي ، الأول أساسيات في علم النفس ، والثاني زي DSM بس جايب لك طريقة الأسئلة اللي ممكن تنسأل ..

اقرئي عنهم قبل لا تشترين شي منهم ..

- من العبارات اللي علقت براسي خلال هالفترة 3 :

" أحجام الأشياء ليست حقيقة " - مراية السيارة

" كلما عرفت .. عرفت أنني لا أعرف .. !!  " – مجهول

" It's time to shine " – أ. منى

- أخيرًا : هنا أشارككم بعض الروابط الملهمة :

أولًا : هالتغريدة كإضافة مُكمِلة لما كتبته ..

ثانيًا : سلسلة تغريدات كتبتها الزميلة حزوا العجمي ، تحكي فيها عن تجربتها في التدريب الميداني .. 

هذا اللي جا ببالي في الوقت الحالي ، وإذا عندكم أي استفسار أو سؤال في نطاق ما كُتب بأكون سعيدة بالإجابة عليه ..

أتمناها سنة مُلهمة ، مُثمرة ، ومليئة بالتوفيق لكل من يخوضها ..